Nockewellepositionssensor
Frieher war e Audo e Audo, un wann's vorne (odder hinne) gequalmt hot, war's kabbutt. Heitzudaach kummen uff ää Audo, wo qualmt, fünfezwannzich, wo's Lämpsche vun de Scheiwewesch-Aalaach brennt, un de Bordkommbjuuder maacht dich närrisch, weil er alle fünf Minudde saaht: Ab in die Werkstatt!
Dodebei hoscht du schunn fünfmool nogeguckt: De Wischwasserbehällder iss voll. De Deggel iss druff. Es Mischungsverhältnis stimmt. Es drobbst nix. Awwer es Wischwasserlämpsche brennt un geht ääfach nimmi aus, außer du fahrscht halt doch zum staatlich gepriefte Kfz-Mechatroniker deiner Wahl. Awwer do druff hoscht du naddeerlich kä Luscht. Also werrscht du ganz langsam wahnsinnich, weil sich des roode Wischwasserlämpsche mit jedem Daach diefer in dei Unnerbewusstsei drängelt un dir verzehlt, dei Audo wär hie, obwohl du ganz genau wääscht, dass alles in Ordnung iss.
Gut, mein Kumpel Karl iss deletzscht ohne zu motze zwäädausend Kilomeeder mit piepsendem Räähsensor durch die Sahara g'scheest - awwer de Karl iss jo aah en rischdische Hartrischel.
Ich als normaler, sensibler Mensch mit ämme g'sunde Grundvertraue in die Errungenschaffde vun de moderne Technik kann so ebbes net. Mei inneri Stimm blärrt „Stopp!”, wann e Warnlichtdvhe brennt - ach wann ich's inzwische naddeerlich besser wisse misst. Awwer verzehl Du emool deiner Beifahrerin, wo met Panik im Blick uffs blinkende Lämpsche zeicht, dass dei Audo blooß uff de Meta-Ebene kabbutt iss, un net in echt.
Bei mir war's de Nockewellepositionssensor. Em Name noo iss der dodefor doo, dass er guckt, ob die Nockewell noch in Position iss. Awwer in Werklichkäät geht er wie alldie annere Sensore ääfach kabbutt, wann's ihm zu langweilisch werd. Un er säät in mir de Zweifel an mei bravie Nockewell, ach wann die mer noch nie de Dienscht versaaht hot (ich hann jo bis zu dämm Moment noch net emool gewisst, dass mei Audo iwwerhaupt e Nockewell hot, un schunn gar net, fer was). Also fahr ich halt doch in die Werkstatt, un dort werd naddeerlich net die Nockewell rebbariert, sondern es gäbbt en neier Sensor. Immerhie: Wänniggschdens finanziell kummt des fascht uff's selwe raus.
Mään ich emool.
